Reuters

Frönsk stjórnvöld ættu að einbeita sér að eigin efnahagsvandræðum í stað þess að gagnrýna ástand efnahagsmála á Bretlandi. Þetta segir einn virtasti hagfræðingur Bandaríkjanna, Martin Feldstein. Um þetta er fjallað á fréttavef breska dagblaðsins Daily Telegraph.

Tilefni ummæla Feldsteins eru yfirlýsingar frá frönskum ráðamönnum fyrir jól um að efnahagsástandið í Bretlandi sé verra en í Frakklandi og að Bretar geti hugsanlega ekki staðið undir skuldbindingum sínum.

Feldstein, sem er prófessor í hagfræði við Harvard-háskóla í Bandaríkjunum, segir enga hættu á því að Bretland standi ekki við skuldbindingar sínar. Hins vegar virtðist frönsk stjórnvöld ekki skilja stöðu efnahagsmála í Frakklandi annars vegar og Bretlandi hins vegar.

„Franskir embættismenn skilja greinilega ekki mikilvægi þeirrar staðreyndar að Bretar standi utan evrusvæðisins og hafi þannig sinn eigin gjaldmiðil sem þýðir að það er engin hætta á að Bretland lendi í greiðsluþroti vegna skulda sinna,“ segir Feldstein í grein á vefsíðunni Project Syndicate.

Hann segir að fyrir vikið geti Bretar alltaf prentað fleiri pund til þess að greiða skuldir sínar en Frakkar geti hins vegar ekki prentað fleiri evrur eftir þörfum. Ef fjárfestar vilja ekki lengur fjármagna skuldir Frakklands, þ.e. ef landið getur ekki lengur fengið lánað til þess að greiða þær, þá neyðist það til þess að lýsa yfir greiðsluþroti.

Feldstein segir ennfremur að það eina sem Frakkar fái út úr því að beina spjótum sínum að Bretum, í kjölfar þess að David Cameron, forsætisráðherra Bretlands, neitaði að undirrita nýjan sáttmála á Evrópusambandsríkja fyrr í þessum mánuði sem ætlað er að reyna að bjarga evrunni, sé það að spennan á milli ríkjanna aukist.

„Frakkland ætti að einbeita sér að eigin innanlands fjármálavanda og erfiðri stöðu viðskiptabanka sinna í stað þess að ráðast á Breta og kalla eftir pólitískum breytingum sem munu ekki eiga sér stað,“ segir Feldstein að lokum.