Ísraelsk varðstöð á landamærunum við Egyptaland. Reuters

„Undanfarið hefur grafalvarleg mismunun gagnvart konum grafið um sig hér, bæði innan hersins og utan hans,“ segir undirhershöfðingi í ísraelska hernum, Rafi Peretz, sem jafnframt er hæst setti rabbíni hersins.

Dagblöð og útvarpsstöðvar í Ísrael vitna í bréf sem hann sendi til hermanna, þar sem hann lýsti þessu yfir, en strangtrúaðir gyðingar hafa farið hamförum í landinu að undanförnu og krafist minni réttinda fyrir konur og meiri aðskilnaðar milli kynjanna á hvers kyns opinberum stöðum.

Peretz segir í bréfinu að engin slík mismunun verði liðin innan hersins. „Ég vinn fað því að tryggja að róttækar, og rangar skoðanir, eins og þær sem orsökuðu atburðina í Beit Shemesh, gegnsýri ekki herinn,“ skrifar hann í bréfinu, samkvæmt fréttasíðunni Ynet.

Í Beit Shemesh, 80.000 manna bæ í nágrenni Jerúsalem, hefur verið alda af deilum milli harðlínugyðinga og annarra íbúa. Hinir trúuðu hafa gert aðsúg að konum á götum úti, krafist þess að karlar og konur þurfi ekki að ganga á sömu gangstéttum, sem sé ósiðlegt, og að konur eigi að sitja aftast í almenningsvögnum, svo þær séu ekki of nálægt karlpeningnum.

Í gærkvöldi fóru þeir svo um hundruðum saman og kveiktu í ruslatunnum, lokuðu götum og köstuðu grjóti í lögreglumenn sem sendir voru til þess að tvístra þeim. Þrír þeirra voru handteknir. Ekki hafa verið óeirðir í morgun.

Mál hafa komið upp innan hersins, þar sem trúaðir karlar hafa gengið út af opinberum viðburðum þar sem kvenhermenn hafa sungið og konur hafa verið beðnar um að fara í önnur og lokuð rými á hátíðarskemmtunum.

Shlomo Fuchs, 44 ára gamall maður, hefur verið ákærður fyrir kynferðislega áreitni þegar hann áreitti 19 ára gamla konu í hernum, Doron Matalon, og kallaði hana hóru, fyrir þær sakir að hún vildi ekki sitja með öðrum konum aftast í herrútu.

Í gærkvöldi komu um 3.000 íbúar Beit Shemesh saman til þess að mótmæla öfgatrúarfólkinu sem er orðið nokkuð fjölmennt í bænum. Hinir strangtrúuðu hafa hins vegar hengt upp skilti þar sem konum er skipað að klæða sig siðlega, í síðerma peysur og pils sem ná niður á kálfa.

Ríkisútvarp Ísraels hefur sagt frá því að ríkissaksóknarinn Yehuda Weinstein hafi sett saman teymi í gær, til þess að taka saman skýrslu fyrir stjórnvöld um hvernig skuli bregðast við þessari þróun.