Sarkozy Frakklandsforseti er afdráttarlaus í tali varðandi ástandið í Sýrlandi. Reuters

Nicolas Sarkozy, forseti Frakklands, hefur ítrekað þá kröfu sína að Bashar al-Assad Sýrlandsforseti láti af völdum. Sarkozy segir að stjórnvöld í Sýrlandi beri ábyrgð á fjöldamorðum.

Embættismaður hjá Arababandalaginu segir að það muni ræða það hvort bandalagið eigi að kalla eftirlitsmenn sína heim frá Sýrlandi vegna ofbeldisverka sem séu enn framin í landinu. Arababandalagið segir að einhver árangur hafi náðst frá því eftirlitsmennirnir komu til landsins í síðustu viku. Hins vegar bendir það á að verkefnið sé á frumstigi.

Sarkozy krefst þess að Assad víki.

„Fjöldamorðin sem sýrlensk stjórnvöld standa á bak við vekja með réttu viðbjóð í arabaheiminum, í Frakklandi, í Evrópu og alls staðar í heiminum,“ sagði Sarkozy í nýársávarpi, sem hann flutti í herstöð franska flotans í Lanveoc-Poulmic.

Fyrir nokkrum vikum sögðu Sameinuðu þjóðirnar að talið væri að rúmlega 5.000 hefðu látist í aðgerðum sýrlenskra öryggisveita, sem beinast gegn mótmælendum í landinu. Mótmælin gegn sitjandi stjórnvöldum hófust í mars í fyrra. Talið er að mörg hundruð til viðbótar hafi látist frá því SÞ birti sína skýrslu um ástandið í landinu.

Alþjóðasamfélagið hefur fordæmt ofbeldisverkin í Sýrlandi og samþykkt að beita stjórnvöld refsiaðgerðum. Þrátt fyrir það er ekkert fararsnið á Assad.

Arababandalagið hefur sent um 100 eftirlitsmenn til landsins. Þeirra verkefni er fylgjast með því hvort sýrlensk stjórnvöld fari eftir áætlun bandalagsins sem miðar að því að öryggissveitarmenn og þungavopn verði ekki lengur á götum borga, stjórnvöld hefji viðræður við leiðtoga stjórnarandstöðunnar og að pólitískum föngum verði sleppt úr fangelsi. Ríkisstjórn Sýrlands samþykkti áætlunina, sem er ætlað að binda enda á ofbeldisverkin í landinu, þann 19. desember sl.

Talsmaður Hvíta hússins í Washington, Jay Carney, segir að ofbeldinu verði að linna. „Við höfum tekið það skýrt fram að ef áætlun Arababandalagsins verður ekki tekin til framkvæmda, þá verði alþjóðasamfélagið að íhuga að grípa til nýrra aðgerða til að neyða stjórnvöld til að hætta að beita eigin þegna ofbeldi,“ sagði Carney.