Reuters

Heilbrigðisyfirvöld í Tékklandi ætla mæla með því að tæplega tvö þúsund konur þar í landi, sem eru með sílikon-brjóstapúða frá PIP, láti fjarlægja þá.

Í frétt í tékkneska sjónvarpinu í kvöld kom fram að tékknesk yfirvöld muni mæla með þessu á morgun en í dag hittu yfirmenn í heilbrigðisráðuneytinu lækna og fulltrúa tryggingarfélaga að máli til þess að ræða þessi mál.

Um er að ræða sílikonpúða frá franska fyrirtækinu Poly Implant Prothese (PIP) en notkun púðanna hefur verið bönnuð þar sem fyrirtækið notaði iðnaðarsílikon í púðana.

Frönsk yfirvöld hafa greint frá því að sextán konur með PIP púða hafi fengið brjóstakrabbamein en alls hafa 20 konur með slíka púða greinst með krabbamein. Hins vegar hefur ekki verið hægt að tengja púðana við aukna tíðni krabbameins.

Talið er að á milli 300 og 400 þúsund konur í 65 löndum séu með sílikon-púða frá PIP. Þar á meðal 400 íslenskar konur. 

Stærsta tryggingarfélagið í Tékklandi á heilbrigðissviði, VZP, hefur ákveðið að greiða kostnað við að fjarlægja sílikon-púðana úr brjóstum kvenna sem hafa fengið slíka púða eftir krabbameinsmeðferð en ekki kvenna sem hafa farið í brjóstastækkun sem fegrunaraðgerð.