Fidel Castro. Reuters

Fidel Castro, fyrrverandi forseti Kúbu, segir heiminn ganga fylktu liði fram af þverhnípi í nýrri grein sem hann skrifar í ríkisfjölmiðil landsins. Ástæðan fyrir því er að hluta til vinnsla á gasi sem fundist hefur djúpt í bergi. Jafnar Castro hættunni af því við hættuna af kjarnorkuvopnum.

Hið svokallaða leirsteinsgas (e. shale gas) er náttúrulegt gas sem er innikróað í grjóthörðum berglögum og fundist hefur í miklu magni á undanförnum áratug. Gasið er nú talið framtíðar-orkuforði heimsins.

Castro, sem nú er 85 ára gamall, skrifaði í grein sinni að ýmsar hættur steðjuðu að heiminum en „tvær þeirra, kjarnorkustríð og loftslagsbreytingar, eru afgerandi og lausn á hvoru tveggja er fjær en áður“. Reuters-fréttastofan segir frá þessu.

Vinnslan á gasinu hefur verið gagnrýnd vegna aðferðarinnar sem er notuð við hana. Til þess að vinna gasið þarf vatn, sand og efni til að brjóta bergið til að losa um gasið. Andstæðingar vinnslunnar segja að aðferðin mengi grunnvatn og geti valdið öðrum vandamálum.

Fyrrverandi leiðtoginn aldni sagði að hann hefði fyrir stuttu heyrt um gasið sem hefur valdið nokkurs konar gasboranaæði í sumum hlutum Bandaríkjanna. Hann er sammála gagnrýnendum aðferðanna og vitnar í skýrslur um neikvæð áhrif þeirra. Bendir hann á að útblástur gróðurhúsalofttegunda sé meiri með leirsteinsgasinu en því sem er unnið úr hefðbundnum gaslindum.

„Það er nóg að benda á að á meðal þess fjölda af efnum sem dælt er í vatnið til að ná upp gasinu eru bensól og tólúen [litlaust, fljótandi kolvatnsefni, unnið úr koltjöru] sem eru hræðilega krabbameinsvaldandi efni,“ skrifar Castro.

Upplýsingarnar um gasið séu nokkuð sem engin stjórnmálasamtök eða skyni borið fólk geti hunsað. Sjálfur hafi Castro verið svo ákveðinn í að dreifa upplýsingum um það að hann hafi „látið hátíðirnar líða hjá“ á meðan hann vann að greininni.