Flutningaskipið Rena, sem strandaði við Nýja-Sjáland í október, hefur brotnað í tvennt í vondu veðri. Gámar og annað lauslegt hefur fallið í hafið og óttast menn að olía muni á ný leka í sjóinn og menga strandlengjuna. Þetta segja talsmenn nýsjálensku siglingamálastofnunarinnar.

Þeir segja að fremri hluti skipsins sé enn fastur á sama stað. Aftari hlutinn hafi hins vegar losnað og sé á hreyfingu. Um sex metra háar höldur skella á skipinu.

Ross Henderson, talsmaður nýsjálensku siglingamálastofnunarinnar, segir að margir gámar og annað lauslegt hafi fallið í sjóinn. Vonskuveður er á svæðinu og segir Henderson að spáin muni haldast óbreytt næstu þrjá til fjóra daga.

Búið er að virkja teymi til að hreinsa upp olíu og koma dýrum til aðstoðar gerist þess þörf.

Rena, sem er í eigu grísks skipafyrirtækis, strandaði á Astralobe-rifinu um 22 km frá Tauranga höfn á Norður-Eyju 5. október sl. Mikið magn olíu lak í hafið og á nærliggjandi ströndum varð mikil olíumengun. Um 20.000 sjófuglar drápust. Strandið er sagt versta umhverfisslys á sjó í sögu Nýja-Sjálands.

Björgunarsveitir hafa náð að fjarlægja rúmlega 1.100 tonn af olíu úr skipinu. Enn eru um 385 tonn um borð, sem er svipað magn og hefur nú þegar lekið í sjóinn.