Bæði bandalagsherinn í Afganistan og forseti Afganistans hafa í dag fordæmt myndskeið, sem birt var á vefnum YouTube og virðist sýna bandaríska landgönguliða míga á blóðug lík talibana.

Segir í yfirlýsingu frá skrifstofu Hamids Karzais, forseta Afganistans, að ríkisstjórn landsins hafi miklar áhyggjur af því sem sjáist á myndskeiðinu. „Þessar gjörðir bandarískra hermanna eru einfaldlega ómanneskjulegar og það bera fordæma þær harðlega.“

Eru bandarísk stjórnvöld hvött til að rannsaka málið og refsa þeim sem framið hafi þennan glæp.

Þá hefur bandalagsherinn í Afganistan, ISAF, sem er undir stjórn NATO, sent frá sér yfirlýsingu þar sem hegðun hermannanna á myndskeiðinu er fordæmd. Segir í yfirlýsingunni, að hermennirnir sem þar sjáist, þjóni ekki lengur í Afganistan.

Segir í yfirlýsingu ISAF, að hegðun hermannanna sé óskiljanleg og ekki í samræmi við þær siðferðiskröfur, sem gerðar séu til hermanna í bandalagshernum. Svo virðist sem um sé að ræða lítinn hóp bandarískra einstaklinga, sem ekki séu lengur í Afganistan.  

Talsmaður talibana sagði í morgun, að myndskeiðið sýndi grimmilegan verknað bandarískra hermanna í Afganistan. Hins vegar væri þetta aðeins sýnishorn af þeim glæpum, sem framdir hefðu verið gagnvart afgönskum almenningi á síðasta áratug.

Sagði talsmaðurinn, að þetta mál ætti ekki að hafa áhrif á viðræður talibana og Bandaríkjamanna, sem snúist fyrst og fremst um fangaskipti. 

Bandaríkjaher segist vera að rannsaka málið og lýsti í morgun myndskeiðinu sem viðbjóðslegu.