Lögregla hefur skotið táragasi og handtekið fjölda mótmælenda í Búkarest, höfuðborg Rúmeníu, síðastliðna þrjá daga. Hörð mótmæli eru gegn frumvarpi sem liggur fyrir þjóðþinginu, um breytingar á heilbrigðiskerfi landsins, en mótmælin hafa smám saman breyst í almenna andstöðu gegn ríkisstjórn landsins og þeim niðurskurði á fjárlögum sem hún stendur fyrir almennt.

Nokkrir mótmælendur slösuðust í óeirðum og voru fluttir á sjúkrahús. Aðrir lentu í stimpingum við lögregluna. Lögreglumaður einn hlaut áverka á höfði eftir að mótmælendur grýttu hann.

Mótmælin byrjuðu fyrst eftir að aðstoðarheilbrigðismálaráðherrann sagði af sér, í mótmælaskyni við heilbrigðismálafrumvarp ríkisstjórnarinnar. Meðal þess sem gagnrýnt hefur verið í frumvarpinu er að það leiði til einkavæðingar í heilbrigðismálum.

Vegna óróans ákvað forseti landsins, Traian Basescu, að draga frumvarpið til baka um helgina og sagði í yfirlýsingu að hann áttaði sig á því að ekki væri stuðningur við það.

„Enginn í kerfinu vill breytingar. Eða mjög fáir vilja þær. Kannski ungir og miðaldra læknar. Sjúkrahúsin vilja ekki breytingar, heimilislæknar vilja þær ekki og kerfið sjálft vill ekki breytingar.“

Mótmælendur vilja hins vegar meira en bara að frumvarpið verði dregið til baka. Þeir heimta margir að Basescu segi af sér.

Ríkisstjórn hans hefur þurft að standa í erfiðum niðurskurði og meðal annars lækkað laun opinberra starfsmanna. Rúmenía hefur átt í samstarfi við Alþjóðagjaldeyrissjóðinn frá því fyrir tveimur árum.