Alex Salmond, forsætisráðherra Skotlands. Reuters

Alex Salmond, forsætisráðherra skosku heimastjórnarinnar, hefur fallist á boð breskra stjórnvalda um viðræður í þessari viku til að binda enda á deilur ríkjanna um framkvæmd hugsanlegrar þjóðaratkvæðagreiðslu Skota um sjálfstæði.

Michael Moore, sem fer með málefni Skotlands í bresku ríkisstjórninni, bauð Salmond til viðræðna til að ræða deilur, sem sprottið hafa upp um hugsanlega þjóðaratkvæðagreiðslu. Talsmaður Salmonds sagði, að fundahöldin yrðu að bíða miðvikudags en þá ætlar skoska heimastjórnin að birta viðræðuskjal um þjóðaratkvæðagreiðsluna. Talsmaðurinn sagði hins vegar nauðsynlegt að Salmond ræddi einnig við David Cameron, forsætisráðherra Bretlands, en svo virtist sem Cameron vildi ekki hitta Salmond að máli. 

Skotland hefur verið hluti af Bretlandi í 305 ár. Breska ríkisstjórnin tilkynnti í síðustu viku, að breska þingið gæti eitt sett reglur um framkvæmd þjóðaratkvæðagreiðslu í Skotlandi. Jafnframt sagði ríkisstjórnin að slík þjóðaratkvæðagreiðsla ætti að fara fram eins fljótt og unnt væri.

Salmond svaraði um hæl og sagði, að skoska heimastjórnin ætlaði að halda þjóðaratkvæðagreiðslu árið 2014 og þá á sínum eigin forsendum.  

Blaðið Sunday Telegraph birti í dag skoðanakönnun, sem sýndi að 40% Skota styðja sjálfstæði landsins en 43% Englendinga vilja að Skotar fari út úr breska ríkjasambandinu. 

Alistair Darling, fyrrverandi fjármálaráðherra Bretlands, sem talinn er líklegur til að leiða þá fylkingu í Skotlandi sem vill viðhalda ríkjasambandinu, sagði að miklir efnahagslegir erfiðleikar myndu fylgja sjálfstæði Skotlands og slíkt væri ótrúlega áhættusamt.