Myndskeið, sem farþegi í farþegaskipinu Costa Concordia tók, sýnir hvernig fólk hópaðist saman á einum af samkomustöðum skipsins á föstudag, þar sem það beið þess að komast frá borði, eftir að skipið strandaði.

Myndbandið sýnir áhöfnina reyna að róa fólkið sem klætt er í björgunarvesti, með því að segja því að skipið sé rétt við Giglio-eyju. Áhöfnin sést biðja farþegana að fylgja  öryggisleiðbeiningum vandlega. 

Yfirvöld telja að Fracesco Shettino skipstjóri hafi farið of nálægt ströndinni með 114.500 tonna skipið, þar sem það rakst á kletta sem rifu stórt gat á botn þess.

Skipstjórinn gaf ekki strax fyrirskipun um að allir ættu að yfirgefa skipið heldur reyndi hann fyrst að sigla skipinu nær eyjunni. Fljótt varð þó ljóst, að engir aðrir kostir voru í boði en að yfirgefa skipið enda streymdi sjór inn og skipið fór fljótt að hallast.

Skipið hélt úr höfn í Civitavecchia, skammt frá Róm, um klukkan 18 á föstudagskvöld. Síðar um kvöldið, þegar farþegar voru nýsestir að kvöldverði kom högg kom á skipið þegar það rakst á rifið. Mikil skelfing greip um sig meðal farþeganna þegar skipið lagðist á hliðina.

Flestir farþeganna voru ítalskir en einnig frá Bretlandi, Þýskalandi, Frakklandi, Spáni, Bandaríkjunum og víðar. Margir voru rosknir og sumir í hjólastól.

Eftir því sem skipið hallaðist meira varð erfiðara að koma út björgunarbátum og hafa sumir farþeganna sagt að þeir hafi litlar sem engar upplýsingar fengið eftir að skipið sökk.

Tala látinna er nú komin upp í fimm en fyrr í dag flutti þyrla í land einn farþega sem fannst á lífi í skipinu.

Alls voru 4229 manns um borð í skipinu þegar það strandaði. Fyrr í morgun var talið að 41 væri saknað en eftir að búið er að fara yfir farþegalista og lista yfir þá sem bjargað var í land, lækkaði sú tala. Var 11 farþega og 6 úr áhöfn skipsins saknað áður en líkin tvö fundust.