Kafarar og björgunarsveitarmenn hafa í dag og í kvöld leitað í skemmtiferðaskipinu Costa Concordia, sem sökk við strendur Toskana sl. föstudag. Margir óttast umhverfisslys leki olía í hafið, en um 2.380 tonn af eldsneyti eru um borð í skipinu.

Fyrirtækið Costa Cruises, sem á skipið, segir að skipstjórinn Francesco Schettino hafi gerst sekur um að breyta stefnunni án leyfis. Pier Luigi Foschi, forstjóri Costa Cruises, sakar skipstjórann um að hafa siglt of nærri nálægum eyjum til að sýna íbúum í landi skipið.

Vegna mikils öldugangs urðu menn að yfirgefa skipið í nokkrar klukkustundir í dag. Skipið, sem er með 17 þilför, liggur á hliðinni rétt við strönd Ítalíu og marar það í hálfu kafi á skeri. Menn óttuðust hins vegar að skipið færi allt á kaf í ölduganginum í dag.

Corrado Clini, umhverfisráðherra Ítalíu, segir að það verði tekin ákvörðun um að lýsa yfir neyðarástandi á næsta ríkisstjórnarfundi næsta fimmtudag - mögulega fyrr. Það verði gert til að setja meira fé í björgunaraðgerðir og hreinsunarstörf, ef það verður umhverfisslys.

Ítalska strandgæslan sagði í kvöld að 29 sé enn saknað. Meðal annars ferðamenn frá Bandaríkjunum, Frakklandi, Þýskalandi og Ítalíu. Lík karlmanns fannst snemma í morgun og alls hafa því sex látist af völdum slyssins.

Yfirmaður köfunarteymis ítölsku strandgæslunnar segir að aðstæður inni í skipinu séu skelfilegar. „Þetta er mjög erfitt. Á göngunum er mikil óreiða og það er erfitt fyrir kafarana að synda í gegn,“ segir Rodolfo Raiteri.