Skipstjóri ítalska skemmtiferðaskipsins Costa Concordia sigldi of nálægt Giglio-eyju til þess að gleðja yfirþjón skipsins, sem er frá eyjunni, samkvæmt frétt ítalska dagblaðsins Corriere della Sera í dag. Sex lík eru fundin en enn er einhverra saknað.

Skipstjórinn, Francesco Schettino, var handtekinn á laugardag og á hann yfir höfði sér ákæru fyrir manndráp af gáleysi og fyrir að hafa yfirgefið skipið áður en öllum farþegunum var bjargað frá borði.

Samkvæmt frétt blaðsins kallaði skipstjórinn yfirþjón skipsins, Antonello Tievoli, upp í brú og sagði: „Antonello sjáðu hvað við erum komin nálægt Giglio,“ hefur blaðið eftir þjónustustúlku sem var um borð.

Tievoli átti að fara í leyfi vikuna á undan en þar sem enginn fannst í hans stað var honum synjað um leyfi. Schettino ætlaði því að gleðja vinnufélaga sinn með siglingunni. Í fréttinni kemur einnig fram að skömmu fyrir strandið hafi Tievoli sagt þar sem hann stóð í brú skipsins: „Farðu varlega, við erum ákaflega nálægt ströndinni.“

Fimmtán er enn saknað eftir strandið á föstudagskvöldið. Yfir 4.200 manns frá 60 þjóðlöndum voru um borð í skipinu, um 3.200 farþegar og rúmlega þúsund manna áhöfn.

Schettino sagði ítölskum fjölmiðlum á laugardaginn að siglt hefði verið á eðlilegum hraða og samkvæmt sjókorti hefði skipið ekki átt að geta siglt á rifið. Gianni Onorato, forstjóri Costa Crociere, fyrirtækisins sem á Costa Concordia, sagði skipið ekki hafa villst af leið en íbúar Giglio hafa hins vegar sagt við fjölmiðla að skipið hafi siglt allt of nálægt landi.

Onorato hefur sagt að um mannleg mistök hafi verið að ræða.