Japanskir hvalveiðimenn sprauta úr vatnsbyssu á bát náttúruverndarsinna. Reuters

Umhverfisverndarsamtökin Sea Shepherd segja, að þrír félagar þeirra hafi meiðst í átökum við japanska hvalveiðimenn í suðurhöfum í vikunni.

Sea Shepherd segja, að tveir úr þeirra röðum hafi meiðst á öxl eftir að Japanir ýttu við þeim með krókstjökum. Þá hafi einn fengið áverka á andliti þegar hrefnuveiðimaður sló hann með langri bambusstöng.

Sea Shepherd er með tvö skip á hrefnumiðunum. Segir Paul Watson, leiðtogi Sea Shepherd, á vef samtakanna, að hvalveiðiskipið Yushin Maru 2 hafi elt skipið Steve Irvin og hafi áhöfn síðarnefnda skipsins sjósett litla báta og reynt að hægja á ferð japanska skipsins. Í kjölfarið hafi átök brotist út.

Japanska sjávarútvegsstofnunin segir hins vegar, að náttúruverndarsinnarnir hafi notað reipi til að reyna að laska stýri og skrúfu hvalveiðiskipsins og kastað að minnsta kosti 30 flöskum, sem innihéldu málningu, á áhöfn japanska skipsins. 

Áhöfn hvalveiðiskipsins hafi ítrekað hvatt náttúruverndarsinnana til að hætta aðgerðum og m.a. notað vatnsbyssur og bambusstangir til að ýta litlu bátunum frá hvalveiðiskipinu.  Segir stofnunin að aðgerðir Sea Shepherd séu afar hættulegar og ógni öryggi hvalveiðiskipsins og áhafnar þess. 

Þrjú hvalveiðiskip héldu úr höfn í Shimonoseki í Japan 6. desember til hrefnuveiða í suðurhöfum.