Borgaryfirvöld í Madríd vilja heimila verslunum að hafa opið allan sólarhringinn Reuters

Eigendur lítilla verslana í höfuðborg Spánar, Madríd, hafa andmælt áformum borgaryfirvalda um að heimila verslunum að hafa opið allan sólarhringinn. Borgaryfirvöld telja að með því eigi verslun eftir að aukast en kaupmenn eru ekki sammála þeim rökum yfirvalda og segja að þeir eigi ekki möguleika á að keppa við stóru vöruhúsin og verslunarkeðjurnar.

Borgaryfirvöld vilja með þessu auka frjálsræði í borginni og það eigi að vera í höndum kaupmanna að ákveða hversu lengi verslanir þeirra séu opnar. Ítalir komu á svipuðum breytingum fyrr á árinu og heimiluðu verslunareigendum að hafa verslanir opnar allan sólarhringinn í þeirri von að það myndi auka hagvöxt í landinu.

Í Madríd eru reglur um afgreiðslutíma verslana með þeim frjálslegustu á Spáni en þar er heimilt að hafa verslanir opnar til klukkan 22 alla daga vikunnar árið um kring. Kaupmenn, sem oft starfa einir eða með fleirum úr fjölskyldunni í verslunum, eru hins vegar ekki ánægðir með að lengja afgreiðslutímann. Þeir geti ekki keppt við stórmarkaði í verði og það sé nóg að hafa búðir opnar til klukkan 22. Flestir loki fyrr og hafi lokað á sunnudögum fyrir utan verslunareigendur í hverfum þar sem túristar eru fjölmennir.

75 þúsund litlar verslanir eru reknar í Madríd og starfa 320 þúsund manns hjá þeim, flestallt fjölskyldureknar verslanir. Segja kaupmenn að þeir vilji áfram eiga fjölskyldulíf og það sé ekki hægt ef þeir neyðist til þess að hafa búðirnar opnar allan sólarhringinn. 

Aftur á móti fagna stóru vöruhúsin og verslanakeðjurnar hugmyndum um sólarhringsafgreiðslutíma verslana og telja að þetta geti skapað 20 þúsund ný störf. Smásala hefur dregist mikið saman á Spáni í kjölfar efnahagskreppunnar árið 2008. Á síðustu þremur árum hafa um fimm þúsund verslanir gefið upp öndina í Madríd vegna kreppunnar. 

Reuters