Hermaður að störfum í Afganistan. Reuter

Afganski hermaðurinn sem drap fjóra franska hermenn í vikunni sagði við yfirheyrslur að hann hefði drepið þá vegna myndbands sem birt var fyrr í mánuðinum og sýndi bandaríska hermenn kasta af sér vatni yfir lík þriggja talibana.

Óttast var að birting myndbandsins á netinu kynni að hafa slæm áhrif á samskipti Nató-hermanna og íbúa Afganistans. Yfirmenn í bandaríska hernum og stjórnvöld í Bandaríkjunum lýstu yfir andstyggð á athæfi hermannanna og sögðust hafa hafið rannsókn á málinu.

Á föstudaginn réðst hermaður í afganska hernum á herstöð í austurhluta Afganistan. Hann myrti fjóra franska hermenn og særði 15 til viðbótar.

Hermaðurinn var handtekinn og við yfirheyrslu sagðist hann hafa fyllst reiði eftir að hafa horft á myndbandið sem sýndi bandaríska hermenn míga yfir lík talibana. Menn sem umgengust hermanninn segja einnig að hann hafi orðið mjög reiður eftir að hafa horft á myndskeiðið.