Tyrknesk stjórnvöld hafa brugðist ókvæða við því að franska þingið samþykkti í gærkvöldi lagafrumvarp um að það varði við hegningarlög að afneita því að Ottómanar (Tyrkir) hafi framið þjóðarmorð á Armenum meðan á fyrri heimsstyrjöld stóð.

Öldungadeildin samþykkti frumvarpið með 127 atkvæðum gegn 86 en fulltrúadeild þingsins samþykkti það í desember. Það verður nú sent Nicolas Sarkozy, forseta Frakklands, til staðfestingar. Búist er við að forsetinn staðfesti lögin fyrir lok næsta mánaðar en það voru þingmenn UMP, flokks Sarkozys, sem lögðu frumvarpið fram.

Tyrkneska utanríkisráðuneytið sagði að þessi ákvörðun franska þingsins væri ábyrgðarlaus og hótaði aðgerðum. Þá sagði Sadullah Ergin, dómsmálaráðherra Tyrklands, við sjónvarpsstöðina CNN-Turk, að Frakkar sýndu með þessu Tyrkjum algera vanvirðingu. 

Armenar segja að allt að 1,5 milljónir manna hafi látið lífið á árunum 1915-1916 þegar ríki Ottómana liðaðist í sundur. Tyrkir hafna því að þjóðarmorð hafi verið framið og segja að tala látinna hafi verið mun lægri.

Recep Tayyip Erdogan, forsætisráðherra Tyrklands, sakaði Frakka um hræsni og gaf í skyn að væntanlegar forsetakosningar í Frakklandi hefðu spilað inn í ákvörðun franska þingsins. Um hálf milljón manna af armenskum uppruna býr í Frakklandi.

Sarkozy skrifaði Erdogan í síðustu viku og sagði að frumvarpinu væri ekki beint gegn neinu einstöku landi. Frakkar viðurkenndu að Tyrkir hefðu liðið miklar þjáningar á lokaskeiði ríkis Ottómana.