Sænskir jafnaðarmenn kynntu nýjan formann flokksins, Stefan Löfven, á blaðamannafundi í dag. Jafnaðarmenn eru í stjórnarandstöðu í Svíþjóð.

Löfven, sem er 55 ára gamall, er formaður verkalýðsfélagsins IF Metall. Sagðist hann vera afar stoltur og ánægður við blaðamenn í dag. Löfven er ekki á þingi en hefur gegnt fjölmörgum ábyrgðarstöðum í Jafnaðarmannaflokknum frá árinu 2005, segir í frétt Dagens Næringsliv.

Löfven tekur við af Håkan Juholt sem sagði af sér í síðustu viku, einungis tíu mánuðum eftir að hann tók við embættinu.

Juholt sagðist, er hann tilkynnti afsögn sína, hafa gert mistök sem flokksleiðtogi en framtíðin yrði að leiða í ljós hve stór þessi mistök hefðu verið. Hann sagðst ekki vilja standa í vegi fyrir þeirri endurnýjun, sem yrði að eiga sér stað innan Jafnaðarmannaflokksins svo hann endurheimti styrk sinn, og því segði hann af sér leiðtogaembættinu.

Ástæða afsagnar Juholts er sögð vera sú, að í haust kom fram að hann hefði sem þingmaður fengið of háa bíla- og húsnæðisstyrki. Í kjölfarið hrundi fylgi Jafnaðarmannaflokksins í skoðanakönnunum. Stjórn flokksins lýsti stuðningi við Juholt en hann ákvað samt að segja af sér.

Juholt tók við leiðtogaembættinu á flokksþingi í mars á síðasta ári en Mona Salin ákvað að segja af sér sem leiðtogi eftir að Jafnaðarmannaflokkurinn beið ósigur í þingkosningum í september 2010.