Ungur drengur sem þjáist af vannæringu gæðir sér á sérstöku næringarbættu jarðhnetusmjöri í næringarmiðstöð á vegum UNICEF í Norður-Úganda. © UNICEF/NYHQ2010-1521/Noorani

Barnahjálp Sameinuðu þjóðanna, UNICEF, kallaði í dag eftir 1,28 milljörðum Bandríkjadala, 157 milljörðum króna, til að fjármagna hjálparstarf í ár en í  því felst að koma börnum í yfir 25 löndum til hjálpar. UNICEF birti í dag skýrslu sína, Humanitarian Action Report, en þar er þörfin í ólíkum löndum greind og farið yfir hvaða leiðir UNICEF telur færar til hjálpar.

Rima Salah, aðstoðarframkvæmdastjóri UNICEF segir að þrátt fyrir mikla neyð á Horni Afríku megi ekki gleyma því sem kallað er þögul neyð, víða um heim, á svæðum þar sem neyðarástand hafi ríkt til lengri tíma.

Í skýrslunni er meðal annars farið yfir þau verkefni sem UNICEF hefur komið að í norðurhluta Afríku og Miðausturlöndum í kjölfar stjórnmálalegs óróa á svæðinu, auk verkefna í fleiri löndum Afríku og á Haítí í kjölfar jarðskjálftans þar fyrir tveimur árum.

Hvað viðvarandi neyðarástand varðar segir í skýrslunni að milljónir barna um allan heim hafi árum saman þurft að lifa við neyðarstand. Sums staðar beinist kastljós fjölmiðla að neyðinni. Annars staðar verður til þögul neyð sem nær aldrei athygli alþjóðasamfélagsins  og því auðvelt og fljótlegt að líta framhjá henni.