Til stendur að funda um að leyfa skosku þjóðinni að kjósa um sjálfstæði. Reuters

Viðræðum um þjóðaratkvæðagreiðslu um sjálfstæði til handa Skotum var frestað í dag vegna þess að breski ráðherrann sem fer með málið er með hlaupabóluna.

Til stóð að Alex Salmond, forsætisráðherra skosku heimastjórnarinnar, og Michael Moore, sem fer með málefni Skotlands í bresku ríkisstjórninni, funduðu í dag til að ræða um skilmála og tímasetningu þjóðaratkvæðagreiðslu um aðskilnað Skotlands frá Bretlandi.

Talsmaður Moore tilkynnti hins vegar í dag að fundinum yrði frestað þar sem ráðherrann hefði ekki enn náð sér af hlaupabólunni.

Skoski þjóðarflokkur Salmond fékk í fyrsta sinn meirihluta á þinginu í Edinborg á síðasta ári og mun Salmond fara fram á að þjóðaratkvæðagreiðsla um aðskilnað verði haldin vorið 2014.

Vill hann fá tíma til þess að afla aðskilnaðinum fylgis en David Cameron, forsætisráðherra Breta, sem er mjög á móti honum, vill hins vegar að efnt verði til kosninganna sem fyrst.

Salmond sagði í ávarpi á skoska þinginu á miðvikudag að hann vildi að spurt yrði í atkvæðagreiðslunni: „Ert þú sammála því að Skotland eigi að vera sjálfstætt ríki?“