Hálfur mánuður er liðinn frá því skemmtiferðaskipið Costa Concordia steytti á skeri við Ítalíustrendur og sökk. Björgunaraðgerðir standa enn yfir. Unnið er að því að losa eldsneyti úr skipinu. Þá er til skoðunar hvort menn geti komið skipinu aftur á flot eða hvort það eigi að rífa það niður á staðnum. Það gæti kostað yfir 50 milljónir dala (um 6 milljarða kr.)

Kafarar eru en að störfum í skipinu og vinna menn jafnframt að því að meta tjónið og skemmdir.

16 létust í slysinu og 16 til viðbótar er enn saknað.

Talið er að slysið gæti kostað tryggingarfélög um 123 milljarða kr., sem er mesta tjón sem hefur orðið vegna skipsskaða.

Björgunarsveitir standa frammi fyrir meiriháttar verkefni. Skipið er engin smásmíði, 290 metra langt og 36 metrar a breidd. Costa Concordia er tvisvar sinnum stærra en Titanic og er talið að það vegi um 45.000 tonn. Skipið liggur á hliðinni og er þar af leiðandi enn þyngra því sjór hefur komist inn í það.

Menn óttast að skerið sem skipið liggur á muni gefa sig og þá mun skipið sökkva.

Nú standa eigendur skipsins frammi fyrir því hvort það komi betur út fjárhagslega að rífa skipið á staðnum og selja það í brotajárn, koma því aftur á flot eða einfaldlega leyfa því að sökkva.

Áður en sú ákvörðun verður tekin verða menn að tæma allt eldsneyti sem er um borð. Eldsneytið er geymt í fjölmörgum tönkum sem eru sumir hverjir á stærð við hús.