Kjarnorkueftirlitsmenn frá Alþjóðakjarnorkumálastofnuninni eru væntanlegir til Teheran, höfuðborgar Írans, í þriggja daga heimsókn til að funda með þarlendum stjórnvöldum um hina umdeildu kjarnorkuáætlun landsins. Fundurinn er sagður afar þýðingarmikill.

Herman Nackaerts, aðstoðarframkvæmdastjóri stofnunarinnar, sagði við blaðamenn á flugvellinum í Vín í Austurríki í dag að hann vonaðist til að menn gætu fundið lausn á deilunni.

„Það sem við vonumst sérstaklega eftir er að Íran muni fást til að ræða þær áhyggjur okkar sem snerta hernaðarlega þætti kjarnorkuáætlunar Írans. Við hlökkum til að hefja viðræður,“ sagði hann.

Eftirlitsmenninir munu koma til landsins á morgun.

Mikil spenna hefur ríkt í samskiptum vesturveldanna og Írans frá því Sameinuðu þjóðirnar birtu skýrslu í nóvember sl. þar sem greint er frá auknum kjarnorkutilraunum Írana.

Stjórnvöld í Íran segja að þetta sé gert í friðsömum tilgangi, eða til að framleiða rafmagn.

Í gær hótuðu þau að stöðva allan olíuútflutning til Evrópu vegna þeirra refsiaðgerða sem samþykkt hefur verið að beita Írana vegna málsins.