Staða Mitts Romneys fyrir forkosningar Repúblikanaflokksins, sem fara fram í Flórída í næstu viku, er sterk. Er talið   að hann muni sigra með yfirburðum. Romney hefur birt nýjar auglýsingar sem er beint gegn helsta keppinauti hans, Newt Gingrich.

Skoðanakannanir í Flórída benda til þess að Romney muni standa uppi sem sigurvegari og verður hann þá skrefi nær því að hljóta útnefningu repúblikana sem forsetaframbjóðandi flokksins síðar á þessu ári.

Tilgangur auglýsingaherferðar Romneys er að láta kné fylgja kviði og ryðja Gingrich endanlega úr vegi. Í þeim er Gingrich harðlega gagnrýndur fyrir að brjóta siðareglur auk þess sem heiðarleiki hans er dreginn í efa.

Romney hefur sótt í sig veðrið að undanförnu en hann þótti standa sig vel í sjónvarpskappræðum sem fóru fram í Flórída sl. fimmtudag.

Samkvæmt skoðanakönnunum nýtur Romney, sem er fyrrverandi ríkisstjóri Massachusetts, 39% stuðnings repúblikana í ríkinu en Gingrich, sem er fyrrverandi forseti Bandaríkjaþings, mælist með 31% fylgi.

Aðrir frambjóðendur eru þeir Rick Santorum og Ron Paul, sem mælast með 11% og 10% fylgi.