Björgunarsveitir urðu að yfirgefa skemmtiferðaskipið Costa Concordia í dag sökum vonskuveðurs. Þeim tókst hins vegar að tengja búnað sem mun dæla eldsneyti úr skipinu. Alls hafa 17 lík fundist í skipinu, sem steytti á skeri og sökk við vesturströnd Ítalíu 13. janúar sl.

Talið er að veðrinu muni ekki slota fyrr en í næstu viku.

Losa varð pramma með dælubúnaði sem var tengdur við skipið vegna ölduhæðar og hvassviðris. Aðstæður á vettvangi eru mjög erfiðar fyrir kafara sem hafa leitað að líkum um borð í Costa Concordia. 

Menn eru búnir undir það að aðgerðir til að tæma olíu úr skipinu muni tefjast um nokkra daga vegna veðurs að sögn talsmanns SMIT, sem er hollenskt fyrirtæki sem stýrir aðgerðinni.

17. líkið fannst í morgun um borð í skipinu, sem liggur við eyjuna Giglio við strönd Toskana. 15 er enn saknað og er engin von að fleiri finnist á lífi.

Menn einblína nú að að koma í veg fyrir umhverfisslys.

Talið er að það muni taka um þrjár til fjórar vikur að dæla allri olíunni úr skipinu. Menn vonast til að hægt verða að hefja dælingu sem fyrst.

Costa Concordia er 290 metra langt skemmtiferðaskip. Rúmlega 4.200 farþegar voru um borð þegar slysið varð.