Forseti Frakklands, Nicolas Sarkozy, flutti klukkustundarlangt ávarp í sjónvarpi í kvöld Reuters

Forseti Frakklands, Nicolas Sarkozy, staðhæfði í sjónvarpsávarpi sem birt var á sex frönskum sjónvarpsstöðvum í kvöld að þær aðgerðir sem gripið hefði verið til vegna fjármálakreppunnar í Evrópu væru farnar að skila árangri.

„Evrópa er ekki lengur á barmi djúprar gjár,“ sagði Sarkozy í ávarpi sínu og bætti því við að fjármálakreppunni væri að linna. 

Fyrir tveimur vikum lækkaði matsfyrirtækið Standard & Poor's lánshæfiseinkunn Frakklands og var það mikið áfall fyrir frönsk stjórnvöld enda var Frakkland áður með hæstu mögulega einkunn, AAA.

Efnahagsástandið hefur versnað til muna í Frakklandi að undanförnu og atvinnuleysi sjaldan eða aldrei verið jafn mikið en um þrjár milljónir Frakka eru án atvinnu.

Sarkozy hefur ekki enn formlega tilkynnt að hann sækist eftir endurkjöri í forsetakosningunum sem fram fara í vor en fastlega er gert ráð fyrir að hann verði í framboði. Hins vegar benda skoðanakannanir til þess að frambjóðandi sósíalista muni hafa betur í kosningunum.

Sarkozy tilkynnti í ávarpi sínu, líkt og fastlega var gert ráð fyrir, að virðisaukaskattur yrði hækkaður um 1,6% en skattahækkunin er ein þeirra aðgerða sem frönsk stjórnvöld grípa til í því skyni að bæta efnahag landsins. Hækkunin tekur hins vegar ekki gildi fyrr en 1. október. „Við vonumst til þess að þetta leiði til aukinnar sölu (áður en skatturinn verður lagður á) og auki hagvöxt,“ sagði Sarkozy í kvöld. Það þýðir að virðisaukaskatturinn verður 21,2% á ýmsar vörur.

Jafnframt greindi Sarkozy frá því að lagður yrði 0,1% skattur á fjármagnsflutninga frá og með ágúst nk.