Kína mótmælti í dag fyrirætlunum japanskra stjórnvalda en þau hyggjast nefna tugi eyja nálægt eyjaklasa sem liggur á svæði sem þjóðirnar hafa deilt hart um. Ætlunin er að eyjarnar, sem eru alls 39, verði komnar á japönsk kort fyrir lok marsmánaðar.

Eyjarnar liggja skammt frá eyjaklasa sem heitir á kínversku Diaoyu en hefur verið kallaður Senkaku í Japan. Klasinn liggur í Austur-Kínahafi og hafa bæði Kínverjar og Japanir, auk Taívan, gert tilkall til hans en umhverfis hann liggja gjöful fiskimið, auk þess sem talið er að þar sé að finna miklar olíu- og gaslindir.

„Diaoyu-eyjar og nærliggjandi smáeyjar hafa alltaf verið hluti af kínversku landsvæði og Kína hefur yfirráð yfir þeim,“ sagði talsmaður kínverska utanríkisráðuneytisins í dag.

Hann sagði að Kína hefði þegar sent Japönum formleg mótmæli og sagði að einhliða ákvörðun Japan um að nefna eyjarnar væri bæði ólögleg og ógild.

Fjórir japanskir stjórnmálamenn hafa heimsótt eyjarnar í janúar, kínverskum yfirvöldum til mikillar óánægju.