JP/Politikens Hus við Ráðhústorgið í Kaupmannahöfn þar sem ritstjórnarskrifstofur Jyllands-Posten eru. Reuters

Héraðsdómur í Ósló sakfelldi í dag tvo karlmenn fyrir að leggja á ráðin um hryðjuverk til að hefna fyrir teiknimyndir af Múhameð spámanni, sem birtust í dönsku dagblaði. Einn var hins vegar sýknaður af hryðjuverkaákæru en fundinn sekur, eins og hinir tveir, fyrir að hafa útvegað ólögleg efni til sprengjugerðar.

Mikael Davud var dæmdur í sjö ára fangelsi og Sawad Sadek Saeed Bujak í 3½ árs fangelsi. David Jakobsen var dæmdur í fjögurra mánaða fangelsi en hann hafði þegar afplánað þá refsingu í gæsluvarðhaldi. Hann veitti norsku öryggislögreglunni, PST, upplýsingar, sem leiddu til þess að mennirnir voru handteknir, en lögreglan hafði þá þegar fylgst með þeim í nokkurn tíma.

Mennirnir þrír voru handteknir í júlí 2010. Davud, sem er kínverskur Uighuri að uppruna en norskur ríkisborgari, hafði fengið þjálfun í meðferð sprengiefna í búðum hryðjuverkasamtakanna al-Qaeda í Pakistan og samþykkt að sprengja upp ritstjórnarskrifstofur danska blaðsins Jyllands-Posten. Lögreglan sagði að Bujak, sem er Kúrdi með norskt dvalarleyfi, og Jakobsen, sem er Úsbeki með norskt dvalarleyfi, hefðu síðan gengið til liðs við Davud og aðstoðað hann við að útvega efni í sprengjuna.

Lögregla telur, að mennirnir tengist sama hópi innan al-Qaeda sem ætlaði að gera árásir árið 2009 á neðanjarðarbrautarstöð í New York og verslunarmiðstöð í Bretlandi.