Rick Santorum (v) og Newt Gingrich (h). Mynd úr safni. Reuters

Rick Santorum, frambjóðandi í forvali Repúblikanaflokksins fyrir forsetakosningarnar í Bandaríkjunum, lýsti því yfir í dag að hann hygðist ekki draga framboð sitt til baka. Annar frambjóðandi í forvalinu, Newt Gingrich, hefur hvatt Santorum til þess að draga framboð sitt til baka.

Santorum mælist nú í þriðja sæti í skoðanakönnunum, langt á eftir frambjóðendunum Mitt Romney og Newt Gingrich. Gingrich hefur ítrekað varað við því að það að tveir harðir íhaldsmenn taki þátt í kosningabaráttunni auki líkurnar á því að Romney, en hann þykir vera nokkuð frjálslyndur í sínum skoðunum, vinni útnefningu Repúblikanaflokksins. Forval Repúblikanaflokksins í Flórída fer fram í dag.

„Mín skilaboð eru þau að allir þeir sem vilja taka þátt í kosningabaráttunni ættu að bjóða sig fram,“ sagði Santorum í samtali við bandarísku fréttastöðina Fox News í dag og bætti við: „Mér finnst að frambjóðendur ættu ekki að hvetja aðra frambjóðendur til þess að víkja til hliðar og draga framboð sín til baka.“

Fyrr í dag hafði Gingrich tjáð fréttamönnum Fox News að mikilvægt væri að einungis einn íhaldsmaður væri í framboði. „Það verður sífellt skýrara að ég er aðalíhaldsmaðurinn í framboði, að ég á besta möguleikann á því að sigra Romney og því lengur sem þessi klofningur á meðal íhaldsmanna varir, þeim mun erfiðara verður það fyrir okkur að stöðva frjálslyndan frambjóðanda sem í ríkisstjóratíð sinni studdi lögleiðingu fóstureyðinga, takmarkanir á skotvopnaeign og skattahækkanir,“ sagði Gingrich í samtali við Fox News.