Átök brutust út að nýju í Kaíró í Egyptalandi í dag, þegar mótmælendum, sem tjáðu reiði sína yfir dauða 74 á fótboltaleik í gær, laust saman við óeirðalögreglu framan við innanríkisráðuneytið. Táragasi var beitt til að hindra för mótmælenda að ráðuneytinu.

Nokkur fórnarlambanna voru jörðuð í Port Said í dag. Yfir 1000 manns særðust þegar óeirðir brutust út á fótboltavelli í borginni í gær, og 74 létust. Fréttaritari BBC í Egyptalandi segir að andrúmsloftið sé afar þungt í höfuðborginni borginni. Íbúar séu bitrir og reiðir.

Í Kaíró söfnuðust mótmælendur saman á Tahrir-torgi í dag, sem fyrr. Margir þeirra voru stuðningsmenn fótboltaliðsins al-Ahly, sem keppti móti heimamönnum í liðinu al-Masry í Port Said þegar óeirðirnar brutust út. Mótmælendur settu upp vegatálma til að loka torginu og fylktu svo liði þúsundum saman í mótmælagöngu að innanríkisráðuneytinu.

Sumir köstuðu grjóti, að sögn BBC, en lögregla brást við með táragasi sem varð til þess að margir lögðu á flótta og sumir tróðust undir. Þar sem sjúkrabílar komust ekki að torginu voru slasaðir fluttir burt á mótorhjólum.

Egypska þingið hittist á neyðarfundi í dag, sem hófst með einnar mínútu þögn í minningu fórnarlambanna. Forsætisráðherrann, Kamal al-Ganzouri, greindi svo frá því að fulltrúi öryggismála í Port Said sitji í gæsluvarðhaldi og að stjórn knattspyrnusambandsins hefði verið leyst upp.