Vetrarhörkur geisa nú víða um Evrópu. Alls hafa 163 látist úr kulda að undanförnu. Víða hefur frostmet verið slegið.

Sums staðar hafa þorp og bæir einangrast vegna þessa, vegir, flugsamgöngur og brautarteinar hafa ekki farið varhluta af frostinu. Gasnotkun er mikil þessa dagana, því fólk reynir að hita upp híbýli sín eftir föngum.

Tugþúsundir hafa leitað skjóls í neyðarskýlum í Úkraínu, en þar hafa 63 látist vegna kuldanna. Átta létust síðastliðna nótt úr kulda í Rúmeníu, alls hafa 22 látist þar undanfarna daga vegna veðursins. Sömu sögu er að segja víða um álfuna.

Búist er við afar miklu frosti í um 50 héruðum í Rússlandi næstu daga og hitastigið í borginni Vladivostok er 21 gráðu frost og ísspöng er yfir flóanum sem borgin stendur við. Mikil snjókoma hefur hamlað umferð á helstu þjóðvegum í Volgograd-héraði.

Frost hefur farið niður fyrir 20 gráður í Póllandi og níu manns létust þar af völdum ofkælingar í dag, en hiti fór niður fyrir 32 °C. Flestir þeirra voru heimilislausir og aldraðir. Alls hafa 29 orðið úti í frosthörkunum í Póllandi í þessari viku.

Frost og fannfergi hefur tafið umferð í lofti og á landi á Ítalíu, einkum í miðhluta landsins og norðan til.

Pálmatré á götum Marseilles-borgar í Frakklandi eru þakin snjó og yfirvöld hafa gefið út veðurviðvaranir í 25 héruðum í suðurhluta Frakklands. Talið er að kuldakastið muni vara fram á sunnudag.