Frá fundi Öryggisráðs Sameinuðu þjóðanna. Reuters

Viðræður um ályktun Öryggisráðs Sameinuðu þjóðanna, þar sem aðgerðir sýrlenskra stjórnvalda gagnvart þegnum landsins er fordæmt, sigldu í strand í kvöld. Mikill vilji hefur verið til að koma til móts við kröfur Rússa, sem vilja ekki að Assad Sýrlandsforseta verði gert að segja af sér.

Meira en 5400 manns hafa látist í óeirðum og mótmælum í Sýrlandi undanfarið ár.

„Fundurinn var ekki góður,“ sagði Hardeep Singh Puri, sendiherra Indlands hjá SÞ eftir fundinn. 

Li Baodong, sendiherra Kína hjá SÞ sagði að meiri viðræðna væri þörf. Kínverjar eru á sama máli og Rússar um að efast um að setja eigi Sýrlendingum strangar skorður.

Fimmtán þjóðir eiga aðild að Öryggisráðinu. Það hefur verið klofið dögum saman í viðleitni við að ná niðurstöðu varðandi afstöðu til Sýrlands. Arababandalagið kallar eftir því að endir verði bundinn tafarlaust á ofbeldið í landinu. Vestræn ríki eru því sammála og vilja stjórnarskipti hið fyrsta.

Kafli í ályktuninni, þar sem segir að Assad verði að láta af völdum, var fjarlægður í morgun að kröfu Rússa. Nú setja Rússar út á annan kafla, þar sem lýst er yfir fullum stuðningi við fyrirætlanir Arababandalagsins.

Rússnesk yfirvöld hafa lengi verið nánir stuðningsmenn Assads og segja að Sameinuðu þjóðirnar verði að varast það sem Rússar kalla tilraun til stjórnarskipta.