Fólk skal hafa ákveðnar tekjur, vilji það flytja til Bretltands og búa þar. mbl.is/retuers

Bresk stjórnvöld eru sökuð um að ætla að leyfa aðeins völdum - og efnuðum, innflytjendum að koma til landsins samkvæmt nýrri stefnu í innflytjendamálum.

Ráðherra innflytjendamála, Damian Green, er í frétt Guardian sagður ætla að tilkynna í dag að stefnan verði sett á að geta valið betur hvaða innflytjendur komi til landsins. Í fréttinni segir að í ræðu ráðherrans í dag muni m.a. koma fram að ekki sé aðeins nauðsynlegt að hafa stjórn á fjölda þeirra sem koma til Bretlands, heldur að „rétta“ fólkið komi, fólk sem geti lagt sitt af mörkum fyrir Bretland, en ekki aðeins notið þess sem landið hefur upp á að bjóða.

Áherslan hefur að sögn Green, verið öll á að takmarka fjölda innflytjenda en nú sé svo komið að nauðsynlegt er að horfa til annarra þátta.

252 þúsund innflytjendur komu til Bretlands árið 2010. „Stóra spurningin núna er hvernig við getum haft hag af innflytjendunum,“ segir Green.

Yfirvöld hafa boðað að í maí verði skýr stefna í innflytjendamálum kynnt. Í henni mun m.a. verða tekið strangara á dvalarleyfum vegna fjölskyldutengsla. Þannig verður ekki lengur sjálfsagt að makar fái dvalarleyfi, tali þeir ekki ensku eða séu ólíklegir til að gera Bretlandi gagn.

Það sem vekur þó mesta athygli er að Green hefur nefnt að gerðar verði ákveðnar kröfur um tekjur innflytjenda. Tekjur skuli vera á bilinu 31-49 þúsund pund á ári, standist innflytjendur ekki áætlanir þar um, fái þeir dvalarleyfi sín ekki endurnýjuð.

Damian Green, ráðherra innflytjendamála. Af vef Wikipedia