Múammar Gaddafi, fyrrum Líbíuforseti. Reuters

Alþjóðaglæpadómstóllinn hafnaði í morgun tilboði Aishu, dóttur Múammars Gaddafís heitins, fyrrverandi leiðtoga Líbíu, um að hún gæfi dómstólnum upplýsingar um Seif al-Islam bróður sinn. Hann er enn í haldi þjóðarráðs Líbíu, án samþykkis alþjóðaglæpadómstólsins.

Bróðir Aishu, Seif al-Islam, er eftirlýstur fyrir glæpi gegn mannkyni og er í haldi þjóðarráðs Líbíu. Dómarar alþjóðaglæpadómstólsins sögðu að Aishu hefði gengið það eitt til að komast í samband við bróður sinn, en honum er haldið föngnum í bænum Zintan, sem er suðvestur af Trípólí, höfuðborg Líbíu.

Lögmaður Aishu segir aftur á móti að hún búi yfir upplýsingum sem gætu hjálpað alþjóðaglæpadómstólnum til að átta sig á því hvað þjóðarráðinu gangi til með því að halda bróður hennar föngnum og hvort vilji sé til þess í raun og veru að veita honum réttlát réttarhöld.

Seif al-Islam var tekinn höndum hinn 19. nóvember. Alþjóðaglæpadómstóllinn hefur falast eftir honum í sína vörslu, en því neitar þjóðarráðið og segir réttast að réttað verði yfir honum á líbískri grund. Alþjóðaglæpadómstóllinn gaf út alþjóðlega handtökutilskipun á hendur al-Islam í júní og segist aldrei hafa samþykkt að réttað yrði yfir honum í Líbíu.

Aisha heldur til í Alsír, ásamt bræðrum sínum Mohamed og Hanniba og móður þeirra, Safiyu. Þeim var veitt hæli þar í landi af mannúðarástæðum.