Vilhjálmur Bretaprins er leitar- og björgunarþyrluflugmaður hjá Konunglega breska flughernum. REUTERS

Vilhjálmur Bretaprins lenti á Falklandseyjum í Suður-Atlantshafi í dag, en þar mun hann dvelja næstu 6 vikurnar við skyldustörf fyrir konunglega breska flugherinn (RAF). Yfirvöld í Argentínu hafa fordæmt veru hans þar og segja hana ögrun.

Vilhjálmur, sem er annar í erfðaröð bresku krúnunnar, starfar sem leitar- og björgunarþyrluflugmaður í hernum. Breska varnarmálaráðuneytið segir prinsinn vera á vettvangi sem almennur hermaður og hann muni ekki sinna þar neinum formlegum störfum sem hertoginn af Cambridge. Tímasetningin er hinsvegar viðkvæm, því senn verða liðin 30 ár síðan stríð hófst milli Bretlands og Argentínu um yfirráð yfir eyjaklasanum í suðri.

Utanríkisráðuneyti Argentínu lét þau orð falla í vikunni að Vilhjálmur væri sendur til eyjanna í „einkennisbúningi landvinningamannsins“. Spenna hefur verið í samskiptum ríkjanna síðan tilkynnt var um för prinsins og ekki hjálpar heldur til að fyrr í vikunni tilkynntu Bretar að þeir hyggist einnig senda herskip af fullkomnustu gerð í jómfrúarferð sína til eyjanna.

Á Falklandseyjum búa um 3.000 manns. Eyjarnar hafa tilheyrt Bretum frá árinu 1833, þótt Argentína geri tilkall til þeirra. Þann 2. apríl 1982 gerði argentínski herinn innrás í eyjarnar sem leiddi til 74 daga langs stríðs við Bretland, í forsætisráðherratíð Margaret Thatcher. 649 Argentínumenn féllu og 255 breskir hermenn.