Costa Concordia marar í hálfu kafi undan strönd eyjarinnar Giglio. Reuters

Skipafélagið Costa Crociere tilkynnti í dag að brátt yrði hafist handa við að fjarlægja flak skipsins Costa Concordia af strandstað. Íbúar nærliggjandi eyju hafa áhyggjur af skipinu og vilja að það verði fjarlægt sem fyrst. Þeir óttast mengun og að skipið hafi neikvæð áhrif á komur ferðamanna.

Fyrirtækið er stærsta skemmtiferðaskipafélag í Evrópu og er hluti af bandarísku samsteypunni Carnival Corp. Costa Concordia strandaði 13. janúar og fórust 32.

Mikil pressa hefur verið á félagið að fjarlægja skipið, sem er tvisvar sinnum stærra en Titanic, 114,500 tonn, og marar nú í hafinu við ítölsku eyjuna Giglio.

Íbúar eyjarinnar óttast að mengun geti stafað af skipinu og vilja að það verði fjarlægt sem fyrst. Þeir hafa ennfremur áhyggjur af að verði það ekki fjarlægt fljótlega verði það til þess að ferðamönnum fækki.

Costa Crociere hefur leitað tilboða frá tíu fyrirtækjum víðs vegar um heiminn til að fjarlægja skipið. Þær kvaðir eru settar í útboðinu að skipið verði fjarlægt á sem stystum tíma og að vinnan hafi sem minnst umhverfisleg áhrif. Talið er að vinnan við að fjarlægja skipið geti tekið allt að tíu mánuði.

Olía er enn í skipinu, en tæp 2400 tonn af eldsneyti eru enn í tönkunum. Til stendur að tæma þá innan tíðar.