Mitt Romney Reuters

Mitt Romney, frambjóðandi í forkosningum Repúblikanaflokksins til forsetakosninga, sagðist í dag hafa mismælt sig þegar hann sagði nýverið að engin ástæða væri til að hafa áhyggjur af fátækum Bandaríkjamönnum, nær væri að hugsa um millistéttina. 

Romney hefur farið með sigur af hólmi í forkosningunum í New Hampshire og Flórída og gangi spár eftir mun hann fá 50% atkvæða í forkosningunum í Nevada sem fara fram á morgun, en helsta keppinaut hans, Newt Gingrich er spáð 25%. 

Mikið fylgi Romneys í Nevada má meðal annars rekja til þess að þar búa margir mormónatrúar, en hann aðhyllist þá trú. En hann höfðar einnig til þeirra repúblikana sem lýsa sjálfum sér sem „mjög íhaldssömum“.

Margfaldur milljónamæringur

Ýmis ummæli Romneys hafa þótt benda til þess að hann sé lítt í tengslum við það hvernig þorri fólks hagar sínu daglega lífi, en hann er margfaldur milljónamæringur. 

„Ég mismælti mig, það er einfaldlega þannig,“ sagði Romney í viðtali á sjónvarpsstöðinni CNN í dag. „Ég átti við það að ég vildi hjálpa fólki til að komast í millistétt, ég vil stækka þann hóp.“

Skattamál Romneys hafa einnig fengið ýmsa til að lyfta brúnum, en skattskýrsla hans, sem hann birti nýverið, leiddi í ljós að hann hagnaðist um 20 milljónir Bandaríkjadollara á fjárfestingum sínum árið 2010. Hann greiddi 13,9% í skatt, sem er talsvert minna en almennt launafólk greiðir af tekjum sínum.