Hópur franskra bænda sturtaði mörgum tonnum af jarðvegi og heyi á götur og stræti Parísarborgar í dag. Tilgangurinn var að mótmæla því sem þeir segja óhóflegt regluverk ESB sem hafi slæm áhrif á landbúnað.

„Borið saman við önnur Evrópulönd, þá er Frakkland eina landið sem þarf að fara eftir svona mörgum reglugerðum sem snúa að umhverfisvernd í landbúnaði,“ sagði Gregoire de Meaux, formaður félags ungra bænda í Vestur-Frakklandi.

„Okkur finnst eins og verið sé að hegna okkur. Við erum í sama kapphlaupi og allar aðrar Evrópusambandsþjóðir, en það er búið að hlekkja okkur niður,“ segir de Meaux.

Þetta hefur verið deilumál í Frakklandi, en margir vilja meira eftirlit með matvælaframleiðslu. Því hefur verið haldið fram að það leiði af sér öflugara verðlagseftirlit. En franskir bændur segja að með þessum reglugerðum verði þeir síður samkeppnishæfir en aðrir evrópskir bændur.