Hermannaveiki orsakast af bakteríu sem kallast Legionella pneumophila. Af vefnum Human - healths

Þrír breskir ferðamenn létust úr hermannaveiki eftir að hafa veikst af sjúkdómnum á spænsku hóteli. Hefur hótelinu verið lokað til þess að koma í veg fyrir frekari smit af völdum bakteríunnar sem veldur veikinni.

Mennirnir þrír, sem voru á aldrinum 73-78 ára, létust allir úr lungnabólgu en samkvæmt Vísindavef Háskóla Íslands eru helstu einkenni hermannaveikihiti, hrollur, hósti, beinverkir, höfuðverkur, lystarleysi og stundum niðurgangur. Lungnabólga er alltaf hluti af sjúkdómsmyndinni. Gangur sjúkdómsins er misslæmur og dauðsföll verða í 5–30% tilfella. Meðgöngutími hermannaveiki er 2–10 dagar.

Fjórtán tilfelli sýkingarinnar, þar á meðal tíu breskir ferðamenn og fjórir Spánverjar, hafa komið upp á hótelinu í sjávarþorpinu Calpe sem er á austurströnd Spánar.

Hermannaveiki orsakast af bakteríu sem kallast Legionella pneumophila. Sýking af völdum þessarar bakteríu greindist fyrst eftir ráðstefnu gamalla bandarískra hermanna sem haldin var á hóteli í Fíladelfíu árið 1976. Hátt í 200 manns veiktust og margir dóu. Við krufningu fannst bakterían í sýni frá lungum. Nú eru þekktar yfir 40 tegundir Legíónella–bakteríunnar en einungis fáar þeirra eru sjúkdómsvaldandi í mönnum, segir á Vísindavef HÍ.