Hillary Clinton, utanríkisráðherra Bandaríkjanna, hét því í dag að styðja við þær refsiaðgerðir sem þegar hafa verið samþykktar gegn Sýrlandi. Hún sagðist ennfremur ætla að leita leiða til að koma í veg fyrir flutning hergagna til landsins.

Hún sagði að bandarísk yfirvöld myndu vinna með öðrum ríkjum að því að finna friðsæla lausn á ástandi mála.

„Það sem gerðist í gær á fundi Sameinuðu þjóðanna var skrípaleikur,“ sagði Clinton og vísaði þar til þess að Rússar og Kínverjar beittu neitunarvaldi til að koma í veg fyrir að aðgerðir sýrlenskra stjórnvalda yrðu fordæmdar af Öryggisráði SÞ.

„Þau lönd, sem neituðu að styðja áætlun Arababandalagsins, bera fulla ábyrgð á því að ógnarstjórnin situr áfram í Sýrlandi,“ sagði Clinton. Hún sagði að 13 af þeim 15 löndum, sem eiga sæti í ráðinu, myndu vilja hefja viðræður sem gætu stuðlað að nýju og lýðræðislegu Sýrlandi.

„Öryggisráðið er máttlaust gagnvart þessu og þess vegna verðum við að leggja áherslu á lausn mála utan vettvangs Sameinuðu þjóðanna.“

„Við verðum að auka diplómatískan þrýsting á stjórn Assads og gera allt sem við getum til að sannfæra samstarfsmenn hans um nauðsyn þess að hann víki,“ sagði Clinton.

„Við munum gera allt sem við getum til að afhjúpa þá sem styrkja ríkisstjórnina fjárhagslega og þá sem selja Sýrlandi vopn sem eru notuð gegn varnarlausu fólki, konum og börnum.“