Að minnsta kosti 56 manns létu lífið í mótmælunum í Sýrlandi um helgina, helmingur þeirra voru óbreyttir borgarar. Evrópuríki hyggjast herða refsiaðgerðir gagnvart Sýrlendingum eftir að Rússar og Kínverjar höfnuðu tillögu um að aðgerðir sýrlenskra stjórnvalda yrðu  fordæmdar.

„Við munum reyna að auka á alþjóðlegan þrýsting og sá tími mun koma þegar stjórn Assads áttar sig á því að hún er algerlega einangruð og getur ekki haldið svona áfram,“ sagði Alain Juppe, utanríkisráðherra Frakklands, í dag.

Juppe sagði ennfremur að Frakkar myndu aðstoða sýrlenska mótmælendur við að skipuleggja hreyfingu sína og að stofnaður yrði alþjóðlegur vinnuhópur um málefni Sýrlands.

Nicolas Sarkozy, forseti Frakklands, átti hugmyndina að vinnuhópnum og hann mun á næstu dögum stefna þeim saman sem telja núverandi ástand í Sýrlandi með öllu ólíðandi.

Juppe sagði afstöðu Kínverja og Rússa „siðferðilegan blett“ á Sameinuðu þjóðunum og sagði að Frakkar væru að íhuga tillögu Túnis um að öll lönd vísi sýrlenskum sendiherrum og sendifulltrúum úr landi.

Evrópusambandið hefur nú þegar gripið til nokkurra refsiaðgerða gegn ríkisstjórn Bashar al-Assads, forseta Sýrlands. Eignir sýrlenskra fyrirtækja og einstaklinga, sem tengjast ríkisstjórn landsins, hafa verið frystar í Evrópu. Einnig hefur verið sett ferðabann til Sýrlands.

Einnig verður innflutningur á hráolíu frá Sýrlandi brátt bannaður.

Gerard Longuet, varnarmálaráðherra Frakka, segir að Evrópubúum beri skylda til að sýna að þeir samþykki ekki það sem fram fer í Sýrlandi.