Frá mótmælum sýrlenskra flóttamanna í Jórdaníu. Mynd úr safni. Reuters

Jórdanskir íslamistar hvöttu í dag bæði múslima og araba til þess að sniðganga allar vörur frá Rússlandi og Kína í kjölfar þess að ríkin tvö beittu neitunarvaldi sínu til þess að koma í veg fyrir að Öryggisráð Sameinuðu þjóðanna fordæmdi ofbeldisverk sýrlenskra stjórnvalda.

„Með því að beita neitunarvaldi sínu í þessu máli hafa Rússar og Kínverjar sýnt fram á það að þeir eru að taka þátt í þjóðarmorðinu í Sýrlandi,“ sagði Hammam Said, leiðtogi hins valdamikla Múslimska bræðralags, á vefsíðu samtakanna, og bætti við „Allir múslimar og arabar ættu að sniðganga rússneskar og kínverskar vörur og sýna þannig sýrlensku þjóðinni, og kröfum hennar um frelsi og sjálfsvirðingu, stuðning sinn. Beiting neitunarvalds í þessu máli varðar alla araba og múslima.“

Að sögn Said eru ofbeldisfullar aðgerðir sýrlenskra stjórnvalda gegn mótmælendum á meðal verstu mannréttindabrota sem sést hafa á síðustu árum. Mannréttindasamtök telja að rúmlega 6 þúsund manns hafi látið lífið í aðgerðum sýrlenska stjórnvalda síðan mótmæli hófust í landinu í marsmánuði á síðasta ári, en helsta krafa mótmælendanna er aukið lýðræði.

Í gær samþykktu 13 af 15 ríkjum Öryggisráðsins ályktun, sem lögð var fram af bæði evrópskum og arabískum ríkjum, um að fordæma aðgerðir sýrlenskra stjórnvalda. Rússland og Kína beittu hinsvegar neitunarvaldi sínu gegn ályktuninni, en þetta er í annað skiptið á fjórum mánuðum sem ríkin tvö hindra að Öryggisráðið álykti um ástandið í Sýrlandi.