Anders Behring Breivik í Ósló áður en sprengjan sprakk. Reuters

Fjölmörg ungmenni, sem lifðu af árás norska fjöldamorðingjans Anders Behring Breivik 22. júlí síðastliðinn, hafa farið fram á að fá að vera viðstödd svokallaðan fangelsisfund á morgun og þar með hitta hann. Um er að ræða 103 manns, sem segjast með þessu vilja búa sig andlega undir réttarhöldin yfir Breivik.

Anette Davidsen, 18 ára og Helene Georgsen, 17 ára, eru meðal þeirra sem hyggjast vera viðstaddar fundinn á morgun. „Ég finn hjá mér þörf fyrir að sjá hann, þannig að ég geti áttað mig á að hann sé ekki hættulegur lengur. Þá hætti ég að vera hrædd. Það er líka mikilvægt fyrir mig að búa mig undir réttarhöldin, en ég held að þau verði mjög erfið andlega fyrir marga,“ segir Anette í viðtali á vefsíðu norska dagblaðsins Aftenposten.

„Tilfinningar mínar gagnvart því að sjá hann aftur eru blandaðar. En ég veit að það er mikilvægt fyrir mig að sjá að hann er lokaður inni, til að ég átti mig fyllilega á því að þetta mun aldrei gerast aftur. Það skiptir máli fyrir mig, þannig að ég geti haldið lífi mínu áfram,“ segir Helene Georgsen.

Það síðasta, sem hún man eftir að Breivik hafi gert í Útey, er að hann skaut á eftir henni og hópi ungmenna þegar þau syntu í ofboði frá eyjunni.

Verjendur Breiviks segja að hann sé að undirbúa ræðu, sem hann vill halda á fangelsisfundinum. Á síðasta fundi vildi hann tala til fólksins sem var viðstatt, en hann fékk það ekki.

Frétt Aftenposten