Vladimir Putin, forsætisráðherra Rússlands, segir enga pólitíska fanga vera í fangelsum landsins. REUTERS

Vladimír Pútín, forsætisráðherra Rússlands, segir enga pólitíska fanga vera í fangelsum landsins. Pútín, sem hyggur á endurkjör í stól forseta landsins í mars, lét þessi ummæli falla í kjölfar ummæla stuðningsmanna Mikhails Khodorkovskís um að hann væri pólitískur fangi (prisoner of conscience).

„Að mínu mati eru engir pólitískir fangar í landinu, þökk sé Guði, jafnvel þó svo að það sé talað um það öllum stundum án þess að nefnd séu nöfn í því samhengi,“ sagði Pútín á fundi með stjórnmálaskýrendum í dag.

„Ég vildi óska að þeir gætu bent mér á að minnsta kosti eina persónu sem væri á bak við lás og slá á pólitískum forsendum,“ hafði Interfax-fréttastofan eftir Pútín í dag.

Khodorkovsky hefur í tvígang verið sakfelldur fyrir fjársvik. Amnesty International hafa lýst því yfir að hann sé pólitískur fangi. REUTERS

„Ef manni væri hent í fangelsi í 10-20 ár, eins og Nelson Mandela (fyrrverandi forseta Suður-Afríku) sem barðist fyrir frelsi blökkumanna - en við höfum ekki slíkt fólk (í fangelsum).“

Khodorkovskí, sem var forstjóri olíufyrirtækisins Yukos, var handtekinn árið 2003 og fundinn sekur um skattsvik. Stuðningsmenn hans hafa sagt að það hafi verið refsing hans fyrir að leyfa sér að fara út í fjárfestingar sem ekki þóknuðust Pútín, sem þá var forseti landsins.

Hann fékk fangelsisdóm til ársins 2016 eftir að hafa verið dæmdur öðru sinni fyrir fjársvik á síðasta ári.

Mannréttindasamtökin Amnesty International hafa lýst því opinberlega yfir að Khodorkovskí sé pólitískur fangi.