Yfirvöld í Sýrlandi hétu því í morgun að halda áfram með árásir sínar á óbreytta borgara í borginni Homs. Þau segja að um sé að ræða vopnuð gengi hryðjuverkamanna og að þeim beri skylda til þess að frelsa landslýð frá þeim.

„Við munum halda áfram að elta hryðjuverkamennina þar til reglu og öryggi verður komið á í Homs og nágrenni. Við  munum yfirbuga alla vopnaða menn sem hrella borgara landsins og ógna lífi þeirra,“ sagði í yfirlýsingu frá innanríkisráðuneyti Sýrlands sem birt var af ríkisfréttastofu Sýrlands, SANA, í morgun.

Þar voru umrædd gengi hryðjuverkamanna einnig sökuð um að bera ábyrgð á þeim voðaverkum sem framin hafa verið í Homs á undanförnum vikum, þar sem hundruð manna hafa látið lífið. 

SANA staðhæfði að sex liðsmenn öryggissveita landsins hefðu legið í valnum eftir átök í Homs í gær og að 11 væru særðir.

Sýrlensk mannréttindasamtök segja að 69 óbreyttir borgarar hafi verið drepnir í Homs í gær eftir að hersveitir Assads Sýrlandsforseta réðust að borginni. Að auki hafi 13 látist í Idlib-héraði, sem er í norðvesturhluta landsins, einn í Aleppo sem er í norðri og 15 í nágrenni höfuðborgarinnar Damaskus.

Mannréttindasamtök segja að meira en 6.000 manns hafi látið lífið í átökum í Sýrlandi frá því að mótmæli hófust þar um miðjan mars.