Úr skólastofu í Danmörku. www.uvm.dk

Nemendur í Vonsild-skóla í Kolding í Danmörku geta átt von á að símar þeirra verði teknir af þeim ef þeir hringja í foreldra sína í skólanum. Margir þeirra taka upp tólið um leið og þeir lenda í útistöðum við skólafélaga eða starfsfólk skólans og segja skólayfirvöld að það geri illt verra. 

Foreldrar vilja aftur á móti ekki að símarnir séu teknir af börnum þeirra. Jens Bay skólastjóri segir að oft sé afar erfitt sé að leysa deilumál ef nemendur hringja sí og æ í foreldra sína.

Undanfarna mánuði hafa verið mörg tilfelli þess að foreldrar birtist skyndilega í skólanum til að „hjálpa“ börnum sínum í átökum við önnur börn, eða að þeir hringja umsvifalaust í skólastjórnendur. 

Formaður landssamtaka foreldra og skóla, Skole og Forældre, Benedikte Ask Skotte, segir að þetta sé merki um að foreldrar séu óöryggir. „Foreldrum ætti að finnast þeir geta treyst skólanum og að skólafólk geti leyst vandamálin sem upp koma,“ segir hún.

Engin lög banna foreldrum að koma í tíma og ótíma í skólann, en Ask Skotte segir að það hafi alltaf áhrif á vinnuumhverfið og samskiptin. „Áður en farsímarnir komu til sögunnar fréttu foreldrar oftast fyrst af árekstrum barna sinna við önnur börn þegar þeir komu heim á daginn. En þegar grátandi eða æst barn hringir, þá er ekkert eðlilegra en að bregðast við með einhverjum hætti.“

Formaður danska skólastjórafélagsins, Anders Balle, segir að foreldrar í dag blandi sér oft í smávægilega árekstra og rifrildi. Þeir krefjist leiðréttingar og sátta fyrir hönd barnanna sinna og það geti þróast á mjög neikvæðan hátt. Mikilvægt sé fyrir börn að læra að sættast og leysa deilur án íhlutunar foreldra.

Bæði Benedikte Ask Skotte og Anders Balle eru mótfallin því að skólar taki síma af börnum. Um sé að ræða nytsamleg tæki og nær væri að ræða hvernig ætti að leysa málin.

Frétt Berlingske Tidende