Frá Kaupmannahöfn í Danmörku. mbl.is

Sífellt fleiri Danir missa leigusamninga á íbúðarhúsnæði vegna þess að þeir standa ekki í skilum. Barnafjölskyldum í þessum hópi fjölgar, en fimmta hver fjölskylda, sem stendur í þessum sporum, er barnafjölskylda.

Þetta kemur fram í tölum frá húsnæðisfélaginu KAB, sem er stærsta húsnæðisfélag landsins. Þar segir að 25% fleirum hafi verið sagt upp húsnæði vegna vanskila í fyrra en árið þar á undan. Húsnæðisfélagið Boligselskabet Danmark hefur sömu sögu að segja.

Borgaryfirvöld í Kaupmannahöfn segja að þar hafi aukningin verið 10%. 

Fimmta hver fjölskylda, sem sagt er upp húsnæði, er barnafjölskylda. Margar þeirra setjast að í hjálparmiðstöðvum, hjá vinum eða ættingjum. 

Forstjóri KAB, Jesper Nygård, segir þessa þróun ógnvænlega. „Fyrir tíu árum sögðum við upp einum eða tveimur í viku hverri. Núna eru það tveir daglega, bara í húsnæðisfélaginu okkar. Fyrir tíu árum heyrði það til undantekninga ef börn voru í þessum aðstæðum, en nú eru mörg dæmi þess.“

Nygård telur þessa þróun beina afleiðingu af vaxandi fátækt í landinu. Atvinnuleysi jókst á síðasta ári og bætur til þeirra verst stöddu lækkuðu.

Helle Thorning-Schmidt, forsætisráðherra landsins og formaður Jafnaðarmannaflokksins, lofaði barnafjölskyldum bættum kjörum í kosningabaráttunni í fyrra. Þar sagði hún meðal annars að sveitarfélögunum bæri skylda til að útvega barnafjölskyldum húsnæði.

Carsten Hansen, sem er ráðherra búsetumála, segir að fátækt sé aðalorsök þessa vanda. Hann segir ennfremur að margir fái bæturnar greiddar fyrsta dag hvers mánaðar, en rukkað sé fyrir húsaleigu 3. dag mánaðarins. Samræma þurfi dagsetningarnar, því brögð séu að því að fólk sé búið að eyða öllum bótunum á þessum tveimur dögum og eigi því ekki fyrir húsaleigu.

Frétt Politiken