Upp hefur komist um viðamikla starfsemi í Evrópu, þar sem fátækt fólk var ginnt til að selja líffæri sín. Myndin er úr myndasafni. Reuters

Sérstakir saksóknarar Evrópusambandsins í Kosóvó hafa sótt til saka sjö manns, sem taldir eru hafa staðið að ólöglegum kaupum og sölu á líffærum. Meðal þeirra ákærðu eru læknar, sem taldir eru hafa ginnt fólk til að selja sér líffæri.

Málið er kallað „Medicus-málið“ eftir læknastofunni í Pristina í Kosóvó,  þar sem talið er að líffærin hafi verið fjarlægð.

Talið er að glæpamennirnir hafi ginnt fólk frá fátækum löndum Austur-Evrópu til að selja sér líffæri. Fólkið fékk 15.000 evrur í sinn vasa, en það jafngildir tæpum tveimur og hálfri milljón íslenskra króna. Þeir seldu síðan líffærin fyrir 100.000 evrur, eða rúmar 16 milljónir íslenskra króna.

Um 20 manns, sem höfðu þannig selt nýru sín, fengu ekki greitt fyrir. Þeir voru látnir eiga sig og nutu engrar læknisaðstoðar eftir að líffærin höfðu verið fjarlægð úr þeim.

Meðal annarra sem liggja undir grun eru Ilir Rrecaj, fyrrverandi heilbrigðisráðherra Kosóvó, og Lutfi Dervishi, þekktur þvagfæralæknir.

Saksóknararnir telja að fórnarlömb sé að finna í Rússlandi, Úkraínu, Ísrael og Tyrklandi. Farið hefur verið fram á samvinnu við lögregluyfirvöld í þessum löndum.