Uppreisnarmenn reyna að hindra för Sýrlandshers inn í borgina Homs. Reuters

Sýrlenski herinn hélt áfram loftárásum á borgina Homs í morgun. Utanríkisráðherra Rússlands er væntanlegur til Damaskus í dag til viðræðna við stjórnvöld til að leita leiða til að koma á friði. Uppreisnarmenn segja að minnst 100 hafi fallið í gær, mánudag.

Fréttaritari BBC í Homs segir að borgarbúar óttist að hersveitir muni gera innrás á jörðu niðri. Sprengjuárásir hófust þar að nýju um klukkan 4 í nótt að íslenskum tíma og hafa staðið sleitulaust síðan.

Rússar og Kínverjar hafa verið gagnrýndir á alþjóðavettvangi fyrir að beita neitunarvaldi gegn tillögu um að Sameinuðu þjóðirnar styðji Arababandalagið til að ná fram friði. Utanríkisráðherra Rússlands, Sergei Lavrov, sem fundar með sýrlenskum stjórnvöldum í dag, segir að viðbrögð Vesturlanda við ákvörðun Rússlands jaðri við „móðursýki“.

BBC hefur eftir talskonu utanríkisráðuneytis Bandaríkjanna að Bandaríkjastjórn voni og vænti þess að Lavrov nýti tækifærið í dag til að gera stjórn Bashars al-Assads Sýrlandsforseta það alveg ljóst hversu einangruð hún er og hvetji Assad og hans menn til að nýta sér áætlun Arababandalagsins og undirbúa stjórnarskipti.

Fréttaritari BBC er einn fárra erlendra fréttamanna í Homs. Hann segir að borgarbúar grafi hina látnu í fjöldagröfum í skjóli nætur, en verði samt sem áður fyrir skothríð á meðan. Óstaðfestar fregnir herma að hersveitir Assad séu nú í innan við 1 km fjarlægð frá þeim borgarhluta sem verst hefur orðið úti í sprengingunum. Borgarbúar óttast því innrás.

Ban Ki-moon, aðalritari Sameinuðu þjóðanna, hefur sagt að vaxandi ofbeldi í Sýrlandi sé með öllu óviðunandi ástand fyrir mannkynið.