Golli / Kjartan Þorbjörnsson

Sænsk móðir hefur verið ákærð fyrir misnotkun og brot gegn áfengislögum fyrir að hafa reynt að fá þriggja ára son sinn til þess að reykja og ekki komið í veg fyrir að honum væri gefinn bjór að drekka. Frá þessu er greint í sænska dagblaðinu Sydsvenskan.

Á myndbandi sem vinur konunnar tók á farsímann sinn sést hvar hún hvetur son sinn óspart til þess að reykja og leiðbeinir honum hvernig hann eigi að fara að við það. Þá sjást aðrir einstaklingar gefa drengnum bjór að drekka án þess að hún mótmælti því.

Drengurinn sést hósta vegna reykinganna og viðstaddir hlæja þá að honum. Hann er síðan hvattur til þess að blása reyk upp í móður sína sem hann gerir og hún gerir síðan slíkt hið sama. Hún sést síðan skamma son sinn fyrir að halda ekki rétt á sígarettunni.

Á myndbandinu heyrist líka hvernig fólkið gerir grín að því hvað myndi gerast ef félagsmálayfirvöld kæmust að þessu og konan heyrist segja að ef það gerðist yrði drengurinn tekinn frá henni. Síðan sést konan skipa drengnum að segja ekki yfirvöldum frá þessu og kalla hann ónefnum í því sambandi.

Fólkið sem var á staðnum hefur borið því við að ekki hafi verið bjór í dósinni sem drengurinn drakk úr heldur vatn. Þá hafi markmiðið með reykingunum verið að fá hann til þess að fá óbeit á þeim.