Ramels gatan í Malmö. Þar var 15 ára gamall drengur skotinn til bana á nýársdag. Reuters

Yfirvöld í Malmö í Svíþjóð hafa í hyggju að skrifa opið bréf til borgaranna í þeim tilgangi að sporna við glæpum í borginni. Lögreglan hefur gripið til samskonar ráðs með góðum árangri.

Borgarstjórinn Ilmar Reepalu segir í samtali við sænska ríkisútvarpið að í bréfinu verði íbúar hvattir til að láta lögregluna vita verði þeir varir við eitthvað glæpsamlegt. Þá vill hann hvetja borgarbúa til að kaupa ekki vörur eða þjónustu sem stendur þeim til boða á svarta markaðinum.

Reepalu segist vilja fylgja fordæmi lögreglunnar í borginni sem hefur sent borgarbúum bréf í þeim tilgangi að stemma stigu við glæpum og ofbeldisverkum í Malmö.

Viðbrögðin hafa ekki látið á sér standa en undanfarinn mánuð hefur ábendingum til lögreglunnar fjölgað mikið. Hún hefur m.a. fengið ábendingar frá einstaklingum sem eru liðsmenn glæpasamtaka.

Alda glæpa og ofbeldis hefur gengið yfir borgina að undanförnu og virðast borgarbúarnir reiðbúnir að leggja hönd á plóg til að sporna við þeirri þróun.

Mikael Mattsson hjá lögreglunni í Malmö segir að lögregluyfirvöld hafi fundið fyrir sterkum viðbrögðum. „Fólk vill aðstoða og leggja sitt af mörkum með því að veita eins mikið af upplýsingum og það getur,“ segir Mattsson.

Lögreglan leitar enn að árásarmanni sem skaut 48 ára fjögurra barna föður til bana í síðustu viku. Lögreglan kveðst viss um að íbúarnir muni aðstoða við lausn málsins sem og lausn annarra mála.

„Það er ljóst að íbúarnir hafa fengið sig fullsadda á því sem hefur verið að gerast í borginni. Þessi viðbrögð geta augljóslega veitt okkur betri innsýn í morðmálið,“ segir Mattsson.