Frá mótmælum í Sýrlandi. Reuters

Íranar hafna með öllu erlendri íhlutun í málefni Sýrlands. Þeir segja að það myndi gera illt verra og hafna ásökunum þess efnis að með þessari afstöðu sé Íran samsekt í ógnaröldinni í Sýrlandi.

„Við munum alls ekki hafa afskipti á nokkurn hátt af innanríkismálum í Sýrlandi og við teljum að afskipti annarra þjóða ógni stöðugleika og öryggi í landinu,“ sagði talsmaður íranska utanríkisráðuneytisins, Ramin Mehmanparast, við fréttamenn í morgun.

Hann var að bregðast við ásökunum íslamska bræðralagsins í Sýrlandi, sem gaf út yfirlýsingu í gær þar sem sagt var að „Rússland, Kína og Íran ættu beina aðild að hinum skelfilegu morðum sem hafa verið framin gegn þjóðinni“.

Talsmaður bræðralagsins, Zouheir Salem, sagði ennfremur í yfirlýsingunni að löndin þrjú sæju stjórn Assads Sýrlandsforseta fyrir vopnum.

Rússar og Kínverjar beittu neitunarvaldi í Öryggisráði Sameinuðu þjóðanna um síðustu helgi, þegar tekin var fyrir tillaga um að fordæma athæfi ríkisstjórnar Assads. 

Sergei Lavrov, utanríkisráðherra Rússlands, mun heimsækja Assad í Damaskus í dag. Lavrov sgir viðbrögð Vesturlanda við aðgerðum Rússa og Kínverja „jaðra við móðursýki“ og staðhæfir að rangt sé að hersveitir Assads beri einar ábyrgð á ofbeldinu.

Mehmanparast hældi Rússum og Kínverjum fyrir að hafa tekið ábyrga afstæðu og sagði að eina lausn mála væri að skapa grundvöll til viðræðna.